კინემატოგრაფიული ხელოვნებისა და მეცნიერების აკადემიამ ოფიციალურად დაადასტურა, რომ „ოსკარის“ დაჯილდოების ცერემონია 2029 წლიდან ექსკლუზიურად YouTube-ზე გადაინაცვლებს. ეს ნაბიჯი ჰოლივუდის ყველაზე მასშტაბური ღონისძიებისთვის თანამედროვე ტრანსფორმაციას ნიშნავს. ამიერიდან, ღონისძიების პირდაპირი ეთერი აღარ გავა ტრადიციული სატელევიზიო არხების ეთერში, არამედ უფასო სტრიმინგის სახით იქნება ხელმისაწვდომი Google-ის პოპულარულ ვიდეოპლატფორმაზე.
კინოაკადემიის მიერ YouTube-თან გაფორმებული ახალი მრავალწლიანი შეთანხმება ვიდეოპლატფორმას „ოსკარის“ დაჯილდოების ცერემონიის ექსკლუზიური სტრიმინგის უფლებებს 2029-დან 2033 წლამდე მიანიჭებს. ეს ცვლილება ისტორიულია, რადგან 1976 წლიდან დღემდე „ოსკარის“ ტელეტრანსლაციას ამერიკული მაუწყებელი ABC უზრუნველყოფდა. მათი პარტნიორობა 2028 წლის ჩათვლით კვლავ ძალაში დარჩება. აღსანიშნავია, რომ გასულ მარტში, აკადემიამ უკვე გამოსცადა ცერემონიის ერთდროული ტრანსლაცია ABC-სა და Hulu-ზე, რაც ციფრული პლატფორმებისკენ მიმართული მომავალი ცვლილებების საწინდარი იყო.
აღნიშნული ცვლილების შესახებ ხმები გასულ წელს, აგვისტოში, ტექნოლოგიურმა პორტალმა CNET-მა გაავრცელა, თუმცა ამჟამად კინოაკადემიის ოფიციალური განცხადებით დადასტურდა.
