ჯანდაცვის მსოფლიო ორგანიზაციის (ჯანმო) ვაქცინების უსაფრთხოების საკითხებზე მომუშავე ექსპერტთა გლობალური კომიტეტის ახალმა ანალიზმა დაადასტურა, რომ არსებული მტკიცებულებების საფუძველზე, ვაქცინაციასა და აუტიზმის სპექტრის აშლილობებს (ASD) შორის მიზეზობრივი კავშირი არ არსებობს. ეს დასკვნა კიდევ ერთხელ ამყარებს ჯანმოს პოზიციას, რომ ბავშვთა ვაქცინები არ იწვევს აუტიზმს.

1999 წელს დაარსებული ვაქცინების უსაფრთხოების გლობალური საკონსულტაციო კომიტეტი (GACVS) აერთიანებს საერთაშორისო ექსპერტებს, რომლებიც ჯანმოს დამოუკიდებელ და ავტორიტეტულ სამეცნიერო რჩევებს აწვდიან ვაქცინების უსაფრთხოებასთან დაკავშირებულ გლობალურ პრიორიტეტებზე. კომიტეტმა 2025 წლის 27 ნოემბერს გამართულ შეხვედრაზე განიხილა 31 კვლევაზე დაფუძნებული მტკიცებულებები, რომლებიც გამოქვეყნდა 2010 წლის იანვრიდან 2025 წლის აგვისტომდე. ანალიზის ფოკუსი იყო თიომერსალის შემცველ ვაქცინებსა და ASD-ს შორის კავშირი, ასევე ზოგადად ვაქცინებსა და ASD-ს შორის ასოციაცია.