ავსტრალია გახდა პირველი სახელმწიფო მსოფლიოში, რომელმაც 16 წლამდე ასაკის მოზარდებისთვის სოციალური მედიის პლატფორმების უმეტესობაზე წვდომა შეზღუდა. აღნიშნული ცვლილება 10 დეკემბრიდან შევიდა ძალაში.

ტექნოლოგიურ კომპანიებს, როგორებიცაა Facebook, X, Reddit, YouTube, Threads და Snapchat, ერთი წელი ჰქონდათ იმისთვის, რომ შეემუშავებინათ მექანიზმები, რომლებიც 16 წლამდე მოზარდებს პლატფორმების გამოყენებისგან დაიცავდა. კომპანიები ვალდებულნი არიან, მიიღონ ზომები, რათა ავსტრალიელმა მოზარდებმა ვერ შეძლონ საკუთარი ანგარიშების შექმნა ან არსებულის შენარჩუნება, წინააღმდეგ შემთხვევაში, მათ 49.5 მილიონი ავსტრალიური დოლარის (33 მილიონი აშშ დოლარი) ჯარიმა დაეკისრებათ.

სოციოლოგებისთვის ეს გადაწყვეტილება წარმოადგენს უნიკალურ შესაძლებლობას, შეისწავლონ სოციალური მედიის შეზღუდვების გავლენა ახალგაზრდებზე, რაც ამ მოვლენას ერთგვარ „ბუნებრივ ექსპერიმენტად“ აქცევს.